遲啲一個叫Raul嘅波多黎各人、同埋一個叫Rene嘅德國人嚟咗我間房。呢幾日、三個人一齊住。有好多次嘅orientation所以有啲忙。
今日、我終於知道我今年住嘅宿舎嘞。係崇基學院嘅神學樓。同一個叫Kim嘅美國人住同一幢宿舎。今朝、我同佢一齊搭的士去宿舎。佢啲英文好快所以我聽唔明…。
到咗宿舎、我就収到鎖匙就去咗我間房。間房同我想像中差唔多、唔算好亦唔算差、都OK啦。喺嗰度休息咗一陣之後、有個阿叔攞咗張被嚟。佢好似唔識英文。一陣間之後、又嚟咗一個姓劉嘅女仔、佢用英文講「Your roommate doesn't come, because of illness. If you need any help, please come to me.」。我叫佢話俾我知最近間Canteen喺邊。Kim都跟住我哋。三個人一齊去咗衆志堂。Kim好似識廣東話。之後知道咗、原來佢係一個ABC(American Born Chinese)。
今日、重有一個重要嘅event、就係香港觀光。集合地点係大學本部嘅停車場、所以去咗衆志堂之後就去嗰度。到到嗰度、我哋就上巴士。同杏林三個人(Takashi、Keisuke、Motoki)、Sam、Raul同一架巴士。
最先去嘅地方係一個海灘(淺水灣)。因爲天氣好好、所以眞係好熱、好晒。我好想游水。Sam教識我知用八達通買果汁。
上返巴士、但係Raul唔喺度…。佢應該上咗其他巴士、冇問題喇啩。
之後巴士到咗個有好多嘢賣嘅地方(赤柱)。Keisuke搵太陽眼鏡。我同Takashi一齊行吓。Takashi叫我一齊飲酒、但係最後都係決定唔飲、而去咗搵樂器舖。途中見到Polly(IASP嘅人)、Takashi問佢呢度附近有冇樂器舖。佢話好似冇、於是我哋就早咗上返巴士。半路買嘅Fanta係青瓜味…、勁難飲、放過我啦…。Raul買咗個奇怪嘅生果(火龍果)。睇到個火龍果嘅時候、Takashi忍唔住笑咗出嚟。
跟住就去咗山頂。以前我都嚟過呢度、但係嗰陣係夜晩。所以呢次係我第一次睇到晏晝嘅山頂。不過眞係好多人。
之後有自由參加嘅晩飯會。我哋決定咗唔參加、而搭巴士返大學。喺巴士裏面、Raul瞓咗覺、我教Keisuke英文。
到咗大學、我同Takashi、Raul就一齊食晩飯。食完之後一齊去電脳室。用Takashi嘅密碼三個人Log in咗。用咗一陣電脳之後、就返宿舎。今日係我第一次住新嘅宿舎。因爲我好攰、所以瞓得好甜。